Fréttir

Fólk sem bíður eftir ættleiðingu er skylt að sækja fræðslunámskeið sem ÍÆ gengst fyrir, skv. reglugerð innanríkisráðuneytisins. 

Námskeiðið er fyrir fólk sem er að taka fyrstu skrefin í ættleiðingarferlinu og er hannað til að hjálpa til við að taka ákvörðun um hvort ættleiðing barns sé skuldbinding sem fólk treystir sér í.  

Athugið: Nú er orðið fullt á námskeiðið í September. Hægt er að skrá sig á næsta námskeið sem verður að öllum líkindum 24.-25.febrúar og 24.mars 2018

Um hvað er námskeiðið?:
Námskeiðið leitast við að svara mikilvægum spurningum um ættleiðingar eins og:

• Er ættleiðing fyrir mig? 
• Hvernig er að vera kjörforeldri? 
• Hver er munurinn að eignast barn eða ættleiða það? 
• Hvaða ábyrgð felst í því að vera foreldri ættleidds barns? 
• Get ég staðið undir þeirri ábyrgð? 

Farið er m.a. í aðdraganda, undirbúning ættleiðinga og líf barnsins áður en ættleiðingin á sér stað.  Sýnt er myndband um líf barna á munaðarleysingjaheimilum erlendis og skoðað hvað börnin þar fara á mis við og hvort mögulegt er að bæta þeim það upp. 

Gögn send:
Nokkru fyrir námskeiðið fá þátttakendur send tvö rit sem Íslensk ættleiðing hefur látið þýða og laga að íslenskum aðstæðum.:

• “Undirbúningsnámskeið fyrir umsækjendur um ættleiðingu erlends barns“.
• “Heilsufar ættleiddra barna”.

Eru þátttakendur beðnir um að lesa ritin vel fyrir þátttöku á námskeiðinu enda byggir námskeiðið fyrst og fremst á virkri þátttöku umsækjenda.

Undirbúningsnámskeiðið er sniðið eftir erlendu fræðsluefni og lagað að íslenskum aðstæðum.

Á námskeiðinu er þátttakendahópurinn blandaður, óháð því frá hvaða landi ættleitt er.

Námskeiðið er 25 klst. og er tvískipt: 

Fyrri hlutinn: 
Verður haldinn laugardaginn 30. september 2017 frá kl. 9:00 til kl: 21:00 og heldur áfram daginn eftir sunnudaginn 1. október 2017 frá kl. 09:00 til 16:00.

Seinni hlutinn: 
Verður haldinn laugardaginn 28. október 2017 frá kl. 9:00 til kl. 17:00

Staðsetning:  
Salurinn „Lækjargötu 4“, Árbæjarsafni. Kistuhyl 4, 110 Reykjavík.  Gengið framhjá miðasölu til vinstri.  Lækjargata 4 er eina húsið með svölum á framhlið.  Verði breytingar á staðsetningu innan Árbæjarsafns, verður það auglýst síðar.

Stundvísi:
Námskeiðið hefst stundvíslega á auglýstum tímum og getur ekki hafist fyrr en allir þátttakendur eru mættir.  Það getur verið skynsamlegra fyrir fólk sem sér sér ekki fært að mæta  á auglýstum tíma að bóka sig á næsta námskeið.

Þín þátttaka skiptir máli:
Gæði námskeiðsins og jákvæð útkoma fyrir þátttakendur byggist að stórum hluta á virkni þeirra sjálfra.

Námskeiðsgjald:
Námskeiðið 75.000 krónur fyrir hjón og 37.500 krónur fyrir einhleypa, innifalið í því gjaldi er morgunmatur og hádegismatur í bæði skiptin og kvöldmatur fyrri helgina. Að auki ótæpilegt magn af kaffi eða tei auk meðlætis.

Leiðbeinendur:
Leiðbeinendur eru þrír og skiptast þeir á að kenna á námskeiðunum: 

Arndís Þorsteinsdóttir, sálfræðingur
Arndís Þorsteinsdóttir lauk BA námi í sálfræði við HÍ árið 1984 og embættisprófi (Cand.Psych.) við Háskólanum í Bergen 1988. Hún hlaut sérfræðiviðurkenningu í klínískri sálfræði árið 2000 og meðferðarnámi í PMT (Parent Management Training) árið 2008. Arndís er starfandi á Þjónustumiðstöð hjá Reykjavíkurborg. Arndís er kjörforeldri og hefur því persónulega reynslu af ættleiðingum.                                         

Þórgunnur Reykjalín Vigfúsdóttir, skólastjóri
Þórgunnur er grunnskólakennari að mennt B.ed. Hún lauk svo meistaranámi MA Stjórnun menningar- og mennastofnanna við Háskólann á Bifröst árið 2011. Þórgunnur hefur starfað um árabil sem kennari við grunn- og gagnfræðiskóla en frá 2000 hefur hún starfað sem skólastjóri, fyrst við Grunnskóla Ólafsfjarðar og frá 2010 við Borgarhólsskóla á Húsavík.  Þórgunnur er móðir tveggja barna,  annað ættleitt frá Kólumbíu. Hún hefur því persónulega reynslu af ættleiðingum.