Fréttir

Fundur í stjórn Íslenskrar ættleiðingar 25. október 2007, kl. 20:00

7. fundur stjórnar eftir aðalfund í mars 2007

 

Mættir: Ingibjörg J, Ingibjörg B, Pálmi, Kristjana, Helgi og Arnþrúður, Guðrún framkvæmdastjóri sat fundinn.

 

Afmæli félagsins

Auglýst var eftir fólki í afmælisnefndina og talað við nokkra aðila. Búið er að fá einn aðila í nefndina en aðrir hafa ekki boðið sig fram. Ákveðið að Kristjana, Ingibjörg J, og Ingibjörg B taki málið að sér fyrir hönd stjórnar og fái með sér fólk úr nefndunum. Stjórnin mun ákveða þema og uppbyggingu afmælishátíðarinnar. Afmælishátíðin verður í febrúar 2008.

 

Ritnefndin sendi beiðni til stjórnar þess efnis hvort kaupa mætti þjónustu af fyrirtæki til að safna auglýsingum í afmælisblaðið sem á að standa undir sér. Stjórnin samþykkti þessa beiðni ritnefndar.

 

Indlandsferð

Ingibjörg J. og Guðrún fóru á ráðstefnu um ættleiðingar á Indlandi og voru þær mjög ánægðar með ferðina og gekk hún vel. 

 

Þær heimsóttu íslenska sendiráðið og var vel tekið á móti þeim þar. Óskað var eftir að ÍÆ léti sendiráðið vita af Íslendingum á vegum þess á ferð í Indlandi og einnig ef það veit af ferðum eldri ættleiddra frá Indlandi. Á næsta ári stendur til að sendiráðið gefi út vegabréfsáritanir fyrir börnin sem verða ættleidd frá Indlandi í framtíðinni. Þetta er sama þjónusta og var nýlega tekin upp í íslenska sendiráðinu í Kína.

 

Ingibjörg og Guðrún fengu fund með háttsettum aðilum í CARA þar sem rætt var um endurnýjun á starfsleyfi ÍÆ á Indlandi og þær tafir sem hafa orðið á endurnýjun þess. Þá kom í ljós að af einhverjum  óþekktum orsökum höfðu ekki öll nauðsynleg gögn skilað sér til CARA varðandi leyfið. Þær voru með skjöl varðandi leyfið með sér og voru þau afhent á staðnum en enn vantar eitthvað af skjölum sem send verða við fyrsta tækifæri. Rætt var um að ÍÆ hefur þurft að senda gögn til CARA í gegnum sendiráð Indlands í Noregi og þar með er erfitt að fylgja gögnunum eftir. Fram kom að dómsmálaráðuneytið má senda gögnin beint til CARA. 

CARA óskar eftir því að þeir foreldrar sem þegar hafa ættleitt frá Indlandi sendi „follow up“ skýrslur og standi við skuldbindingar sínar varðandi ættleiðinguna. Um er að ræða alls 14 skýrslur fyrir hvert ættleitt barn. Sent verður ákveðið bréf til foreldra indverskra barna og þeir beðnir um að standa skil á þessum skýrslum sem fyrst.

 

Farið var í heimsókn á barnaheimilið sem ÍÆ er í samstarfi við í Kolkata og rætt við Anju sem rekur heimilið. Um er að ræða tvö heimili en um 40 börn eru á barnaheimilinu núna.

 

Önnur mál

 

Fleira ekki rætt og fundi slitið.

 

Arnþrúður Karlsdóttir

Fundarritari