Fréttir

„Þetta er búið að taka gríðarlega langan tíma og enn virðist allt sitja fast. Rússar eru að endurskoða ættleiðingarlöggjöfina hjá sér og á meðan gerist fátt,“ segir Hörður Svavarsson formaður félagsins Íslensk ættleiðing. Í febrúar töldu menn að það væru að nást samningar við Rússnesk stjórnvöld um ættleiðingarsamband á milli landanna. Lokadrög að samningi um alþjóðlegar ættleiðingar milli Íslands og Rússlands voru send með hraðsendingu til Rússlands og áttu félagið von á svari um hæl en það hefur ekki enn borist.

Að meðaltali hafa verið ættleidd 15 börn hingað til lands á ári. Í fyrra voru 17 börn ættleidd hingað til lands með milligöngu íslenskrar ættleiðingar. Níu drengir og átta stúlkur, flest börnin komu frá Kína. Á þessu ári hefur verið gengið frá ættleiðingu fjögurra barna og það fimmta er á leiðinni. Líkur eru á að ættleiðingar hingað til lands verði færri í ár en undanfarin ári.