Fréttir

Danska ættleiðingastofnunin, DIA, sem haft hefur milligöngu um frumættleiðingar frá öðrum löndum er hætt að taka við umsóknum. Var gefin út fréttatilkynning um þetta fyrr í mánuðinum. Ástæðan er sú að stofnunin telur sig ekki geta tryggt að mál verði kláruð vegna fjárskorts og var fjölskyldum greint frá þessu í vor.

Alþjóðlegum ættleiðingum hefur fækkað mikið á síðastliðnum árum og er ástæðan sú að stór lönd, eins og Kína, hafa lokað fyrir umsóknir vegna þjóðfélagsbreytinga.

Á Íslandi hefur frumættleiðingum frá öðrum löndum fækkað úr um 20 á ári niður í fimm á aðeins fjórum árum. Sama er uppi á teningnum í Danmörku. Árið 2010 voru 418 erlend börn ættleidd þar í landi en árið 2018 voru þær aðeins 64.

„Nú þegar við ákveðum að taka ekki við nýjum umsækjendum er það eingöngu vegna þess að við í stjórninni teljum ekki rétt að setja ættleiðingarferli af stað sem við getum ekki tryggt að hægt verði að vinna áfram. Fjárhagslegar horfur fyrir árið 2020, sýna fram á mikinn halla. Þess vegna höfum við því miður neyðst til að taka þessa ákvörðun, að taka ekki við nýjum umsækjendum,“ segir í tilkynningunni sem Lars Ellegaard, stjórnarformaður DIA, undirritaði.

Þegar ættleiðingum fækkaði dróst fjármagn til DIA saman og var svonefndri áfrýjunarnefnd falið að rannsaka möguleika á fjármögnun og koma á nýju kerfi, eins og breið samstaða er um á danska þinginu. Það hefur dregist og ólíklegt er að nýtt kerfi líti dagsins ljós fyrr en árið 2021. – khg

Fréttablaðið - Danir hætta að taka við ættleiðingarumsóknum vegna fjárskorts