Fréttir

Reuters

Fram kemur í nýju fréttabréfi Íslenskrar ættleiðingar að félagið telji þá breytingu til bóta að veiting leyfa til ættleiðinga til Íslands hafi um áramótin verið færð frá sýslumannsembættinu í Búðardal og til sýslumannsembættinu í Reykjavík með gildistöku nýrrar reglugerðar í þeim efnum.

Félagið leggur þó áherslu á að um bráðabirgðafyrirkomulag verði að ræða og lýsir yfir stuðningi við hugmyndir um sérstaka stofnun, Fjölskyldustofnun, sem héldi utan um afgreiðslu sifjamála og þar með talið ættleiðingarmál sem ræddar hafi verið í starfshópi á vegum innanríkisráðuneytisins um nýja ættleiðingarlöggjöf.

„Stjórn Íslenskrar ættleiðingar tekur undir hugmyndir um Fjölskyldustofnun og telur hana vera bestu úrlausn sem er í sjónmáli. Mikilvægt er að hafa í huga að ættleiðingar snúast um málefni barna og tryggja verður með öllum ráðum að hagsmunir þeirra séu hafðir í fyrirrúmi,“ segir í fréttabréfinu.

19 börn ættleidd frá fjórum löndum

Samtals voru 19 börn ættleidd af íslenskum foreldrum á nýliðnu ári fyrir milligöngu Íslenskrar ættleiðingar samkvæmt því sem fram kemur ennfremur í fréttabréfinu. Þar af voru 11 drengir og 8 stúlkur.

Fram kemur að eitt barnanna hafi komið frá Indlandi, tvö frá Kólumbíu og tvö frá Tékklandi, en líkt og undanfarin ár hafi langflest komið frá Kína eða 14 talsins. Börnin eru fædd á árunum 2007 til 2011 en flest árið 2010.

Þá segir í fréttabréfinu að Íslensk ættleiðing hafi á síðasta ári gert samning um milligöngu um ættleiðingar frá Tógó á vesturströnd Afríku en þegar bíði fjórar umsóknir um ættleiðingar frá ríkinu afgreiðslu.