Fréttir

Fyrirlestur- Bati eftir áföll í æsku

Næsta fræðsla á vegum Íslenskrar ættleiðingar verður 12.maí næstkomandi klukkan 20:00 í sal Framvegis í Borgartúni 20, þriðju hæð. Heiti fyrirlestursins er "Bati eftir áföll í æsku" og til okkar er að koma Svava Brooks en hún er TRE® sérfræðingur og ráðgjafi. Hún vinnur gjarnan með einstaklingum sem eru í bata eftir áföll í æsku. 

Svava hefur unnið með sjálfshjálparhópum í Bandaríkjunum og á Íslandi. Hún hefur einnig starfað fyrir einkafyrirtæki, stofnanir og grasrótarsamtök í mörg ár. Að auki hefur Svava unnið við forvarnir gegn kynferðisofbeldi í meira en áratug. Svava hefur gefið út vinnubækur og skrifar gjarnan um heilun og líf eftir ofbeldi, um áföll og víðtæk áhrif þeirra. Þetta má finna á bloggsíðu hennar.

Rannsóknir sýna að áhrif streitu, spennu og áfalla eru oftast bæði andleg og líkamleg.

Svava fræðir okkur um áhrif streitu og áföll á líkamlega og andlega heilsu okkar, og á samskipti og líðan okkar. Á síðastliðnum árum erum við að kynnast og læra hvernig hægt er að vinna með líkamann og taugakerfið, m.a. til að fyrirbyggja erfiðleika í samskiptum og bæta andlega og líkamlega heilsu. Einnig lærum við hvernig við getum marktækt minnkað líkurnar á því að við verðum alvarlega veik síðar á lífsleiðinni.

Meiri þekking og skilningur á rannsóknum eflir okkur í vinnu með það sem við getum breytt. Líkaminn og hugurinn breytist stöðugt og þroskast. Svava deilir með okkur aðferðum og verkfærum sem við getum strax notað við að byrja á að tengjast eigin líkama og minnka um leið streitu og álag á taugakerfið. Það veitir betri líðan og betri tengsl við okkur sjálf og aðra. Það sem við kynnumst er m.a. þetta:

•            Áhrif áfalla og streitu á líkamann

•            Hegðun og líðan, áhrif eða orsök?

•            Hverju getum við breytt

•            Líkaminn heilar sig

•            Áhrif umhverfisins

Fræðslan er félagsmönnum að kostnaðarlausu en það kostar 1000 krónur fyrir aðra.

Einnig verður boðið uppá að horfa á erindið á netinu en þá þarf skráning að berast í síðasta lagi kl 16:00 sama dag og erindið er.

Hlökkum til að sjá ykkur


Svæði