Fréttir

Mbl - Fjórar á tíu árum

FJÓRUM einhleypum einstaklingum hefur verið veitt leyfi til frumættleiðingar á barni á síðustu tíu árum að því er fram kemur í skriflegu svari dómsmálaráðherra, Sólveigar Pétursdóttur, við fyrirspurn Össurar Skarphéðinssonar þingmanns Samfylkingarinnar. Svarinu var nýlega dreift á Alþingi og er í því miðað við þau gögn sem er að finna um þessi mál í tölvuskráningarkerfi dómsmálaráðuneytisins.

Af þessum fjórum ættleiðingarleyfum voru tvö veitt á þessu ári, eitt árið 1995 og eitt árið 1992. Í elsta málinu er um að ræða ættleiðingu á íslensku barni en í hinum tilfellunum var um frumættleiðingu á erlendu barni að ræða.

Í svarinu kemur fram að í öllum tilvikunum hafi verið talið að umsækjendur hafi sýnt fram á að þeir væru hæfir til að ættleiða barn og að aðstæður væru þannig að þeir gætu búið viðkomandi barni trygg og góð uppeldisskilyrði og að ættleiðing yrði barni til gagns.


Svæði