Fréttir

Ágætu félagsmenn. Það er ákveðinn léttir hjá stjórn og starfsmönnum IÆ eftir að heimsókn yfirmanna frá kínversku ættleiðingarmiðstöðinni (CCAA) lauk á laugardagsmorgun en hún tókst í alla staði mjög vel. Mr. Lu sem fer fyrir ættleiðingarmálum í Kína heillaðist af krökkunum og það er ljóst að mikil þátttaka og sú gleði sem skein frá hópnum í Fram heimilinu hafði sterk áhrif á hann. Þá heillaðist hann virkilega af Matthildi og fjölskyldu í Blómvangi og talaði um fallegt og skipulagt heimili. Félagar ÍÆ eigi miklar þakkir skyldar fyrir hversu undirtektir voru góðar að koma og taka þátt í þessu með undirbúningi, veisluföngum og frágangi en af 88 fjölskyldum sem þegar hafa ættleitt barn frá Kína komu 59 fjölskyldur til fundar við sendinefndina.

Fulltrúar stjórnar ÍÆ áttu í dag fund með Jóni Kristjánssyni félagsmálaráðherra vegna styrkjamála, en stjórnin hafði óskað eftir fundi með honum snemma í mars. Fundurinn var mjög ánægjulegur og þar kom fram að fyrir lok mánaðarins mun starfshópur þriggja ráðuneyta (félags-, dóms- og fjármálaráðuneyti) hefja störf sem hefur það hlutverk að semja drög að reglugerð um fyrirkomulag vegna styrkja til ættleiðinga.

Fjölskylduboð 20. apríl kl. 10:00 til 12:00 Dagana 19. til 22. apríl dvelur sendinefnd frá CCAA í Kína á Íslandi í boði Íslenskrar ættleiðingar. Í tilefni af komu þeirra ætlar Íslensk ættleiðing að bjóða fjölskyldum sem ættleitt hafa börn frá Kína að hitta sendinefndina þann 20. apríl (Sumardaginn fyrsta) milli kl. 10:00 og 12:00 í Framsalnum, Safamýri 26 í Reykjavík.