Fréttir

Undanfarið misseri hefur verið í deiglunni að koma á formlegu sambandi milli Heyrnar- og talmeinastöðvar Íslands og Íslenskrar ættleiðingar. Samstarfið lítur að börnum sem ættleidd eru með milligöngu félagsins og eru með skarð í vör eða skarð í góm. Fyrir stuttu funduðu fulltrúar Íslenskrar ættleiðingar með Kristínu Th. Þórarinsdóttur talmeinafræðingi frá Heyrnar- og talmeinastöð Íslands með það að markmiði að skýra verksvið, tilvísunarferli og vinna verkferla í tengslum við samstarfið. Í framtíðinni mun Íslensk ættleiðing hafa samband við Heyrnar- og talmeinastöð Íslands þegar búið er að para barn með skarð í vör eða skarð í góm við umsækjendur hjá félaginu. Verðandi foreldrar fá viðtal og ráðgjöf hjá Heyrnar- og talmeinastöð Íslands og bætist sú ráðgjöf við þá fræðslu og ráðgjöf sem félagsmenn fá nú þegar. Heyrnar- og talmeinstöð Íslands er með mjög góða, fræðandi og áhugaverða heimasíðu www.hti.is. Þar má finna t.d. þróun máls og tals á slóðinni: http://hti.is/index.php/is/tal/throun-mals-tals-barna og almenna málörvun barna á: http://hti.is/index.php/is/tal/almenn-malvorn-barna. Auk þess er hægt að hlaða niður bækling um börn fædd með skarð í vör og/eða gómi: http://hti.is/index.php/is/tal/born-med-skard-i-vor-eda-gomi

Gestur Pálsson barnalæknir talar um læknisfræðina í tengslum við börn með skilgreindar þarfir, en Kristinn Ingvarsson, framkvæmdarstjóri Íslenskrar ættleiðingar tekur fyrir sjálft ættleiðingarferlið.

Á barnaheimilinu í Most sameinaðist fjölskylda nú í morgun. Andri og Þuríður voru að hitta litla drenginn sinn í fyrsta skipti og var stundin töfrum líkust. Nýbakaðir foreldrarnir fengu að hitta Tómas og leika við hann í stutta stund. Hann fékk sér svo hádegisverð og hádegislúr. Eftir hádegið fengu Andri og Þuríður svo að hitta hann á ný og kynnast betur, leika og skoða bókina sem þau höfðu sent honum með myndum af sér, ömmunum og öfunum og auðvitað honum sjálfum. Umsókn Andra og Þuríðar var samþykkt af yfirvöldum í Brno 16.12.2013 og voru þau pöruð við Tómas í mars. Andri og Þuríður voru því að biðlista í Tékklandi í þrjá mánuði. Þetta er þriðja fjölskyldan sem sameinast með milligöngu Íslenskrar ættleiðingar á þessu ári. Nú hafa 14 börn verið ættleidd frá Tékklandi til Íslands.