Fréttir

Á dögunum bankaði þakklát fjölskylda á dyrnar hjá félaginu og langaði til að leggja því lið og þakka fyrir veitta þjónustu. Fjölskylduna langaði að styrkja félagið sitt og var búin að leggja inná reikning þess eina milljón króna. Stjórn Íslenskrar ættleiðingar þiggur styrkinn með þökkum og mun verja honum til góðra verka í þágu ættleiddra barna og fjölskyldna þeirra.

Jólasveinarnir munu hafa í nógu að snúast þessi jólin því að þeir hafa rétt sex daga til að koma sér til Reykjavíkur og hitta félagsmenn Íslenskrar ættleiðingar í Hörpunni. Við vonum að það verði nóg eftir í pokanum þegar þeir koma suður svo að hægt verði að gleðja börnin á höfuðborgarsvæðinu. Gamanið hefst kl. 13:00 í Hörpunni og verður boðið uppá vöfflur og heitt súkkulaði, ávexti og safa fyrir þá sem það vilja.

Sunnudaginn 27. nóvember standa félagsmenn norðan heiða fyrir jólaballi á Akureyri. Fjörið hefst kl. 11:00 í Brekkuskóla og hefur heyrst að jólasveinar muni leggja leið sína á ballið með pokann á bakinu og hver veit nema að í honum leynist eitthvert góðgæti og jafnvel smá glaðningur…